839 total views, 1 views today

اردو اور پنجابی زبان کی مشہور و معروف ناول نگار، افسانہ نگار اور ڈراما نویس بانو قدسیہ 28 نومبر 1928ء کو فیروز پور، پنجاب میں پیدا ہوئیں۔
وکی پیڈیا کے مطابق آپ برطانوی ہندوستان میں ایک زمیندار گھرانے میں پیدا ہوئیں۔ آپ کے والد چوہدری بدرالزماں چٹھا زراعت میں بیچلر کی ڈگری رکھتے تھے۔ اُن کا انتقال بانو قدسیہ کی چھوٹی عمر میں ہی ہو گیا تھا جب کہ ابھی بانو قدسیہ محض ساڑھے تین برس کی تھیں۔
تقسیم ہند کے بعد وہ اپنے خاندان کے ساتھ لاہور آ گئیں۔ لاہور آنے سے پہلے وہ وہ مشرقی بھارت کے صوبہ ہماچل پردیش دھرم شالا میں زیرِ تعلیم رہیں۔ اُن کی والدہ مسز چٹھا بھی تعلیم یافتہ خاتون تھیں۔
بانو قدسیہ نے مشہور ناول و افسانہ نگار اور ڈراما نویس اشفاق احمد سے شادی کی تھی۔
آپ اپنے کالج کے میگزین اور دوسرے رسائل کے لیے بھی لکھتی رہی ہیں۔ آپ نے کنیئرڈ کالج برائے خواتین لاہور سے ریاضیات اور اقتصادیات میں گریجویشن کیا۔ بعد ازاں آپ نے 1951ء میں گورنمنٹ کالج لاہور سے ایم اے اردو کی ڈگری حاصل کی۔
بانو قدسیہ نے اردو اور پنجابی زبانوں میں ریڈیو اور ٹیلی وِژن کے لیے بہت سے ڈرامے بھی لکھے۔ آپ کا سب سے مشہور ناول ’’راجہ گدھ‘‘ ہے۔ آپ کے ایک ڈرامے ’’آدھی بات‘‘ کو کلاسک کا درجہ حاصل ہے۔
1983ء میں حکومت پاکستان کی جانب سے آپ کو ستارۂ امتیاز سے نوازا گیا۔ 2010ء میں دوبارہ حکومت پاکستان کی جانب سے ہلالِ امتیاز سے نوازا گیا جبکہ 2012ء میں کمالِ فن ایوارڈ سے نوازا گیا۔ 2016ء میں آپ کو لائف ٹائم ایچومنٹ ایوارڈسے نوازا گیا۔
آپ 4 فروری 2017ء کو وفات پاگئیں۔




تبصرہ کیجئے